Xefe Suku Samalari Estrada Buibau – Samalari Laiha Kualidade

BAUCAU - Xefe Suku Samalari, Rui Sequeira Magno konsidera kontrusaun ba rehabilitasaun estrada rutinas  husi Larubi suku Buibau to’o iha suku Samalari laiha kualidade.

Ba Business Timor  iha suku Samalari semana liuba, Rui kasu lia katak projetu Estrada ne’e nee nia kondisaun grave liu bainhira udan monu rai la para.

“Laiha kualidade liu  tanba foun-foun sira mai iha ne’e sira hatudu  duni buat nebe kualidade duni  maibe mudansa klimatika ita nia rai udan hela deit alkatraun sira nebe  tau iha gelombang-gelombang (laloran) tiha ona, katak kabubuk,  balun kuak ,balun sai hanesan tahu mak sae tiha fali ona,” xefe suku ne’e nota.

Tuir nia katak estrada ne’e hala’o uza ekipamentu boot hanesan selindru, uza traballador lokal, maibe nia rezultadu mak bainhira kompañia lulun sasan ho nia traballador sira, Estrada mos lulun an tuir sira.

“Sira uza tenaga kerja Larubi nian, husi Kaibada, husi Boruma ,maibe agora laiha, sira uza ema iha ne’e duni  maibe sira lulun mobilariu sira fila estrada mos lulun sa’e hanesan ita hare dadauk ne’e,” tenik Rui hodi hatudu Estrada aat ne’e.

Nia husu ba kompania sira tenke hatudu sentidu nasionalismu.  “Katak  timoroan buat  saida mak imi fo ba  imi nia rai? Labele halo sistema Indonesia nian dehan rehabilitasaun pembangunan lima tahun ne’e ladiak, mai ita hadia ita nia nasaun ba  futuru ho buat nebe diak ba ita nia rai no ba ita nia oan sira.”

Tuir Rui, nia rasik, nudar xefe suku, hato’o ona informasaun  diretamente ba  kompania  no mos diresaun obras publiku  kona ba problema konrtuksaun estrada nian ne’e.“Informasaun sira hau hato’o ona ba iha kompania, sira dehan sira bele hadia fila fali no mos hau hato’o  pna ba iha diresaun obras publika kona ba estrada nebe laiha kualidade,” nia hatete.

Tuir nia projetu kontruksaun ba estrada Samalari - Buibau  hamutuk kompania neen (6) mak kaer maibe nunka hatudu nia kualidade.Nia temi katak iha kompania ida naran Big Construction hatudu sira nia inisiativa rasik, hodi hadia fali estrada ne’e.

“Sira hatudu sira nia sentidu nasionalismu, sira rombak  500 meter mai fali iha Vela Vista ninian  nebe sira hatudu duni nia diak duni. Maibe hau seidauk hare ninia kualidade  to’o fulan nebe mak ita hatene ninia aat iha  ka lae no ninia diak iha ka lae,” dehan Rui.Tuir observasaun Business Timor katak estada  Samalari - Buibau laiha kualidade tamba aspal nebe kompania fui mihis liu hodi halo bee lalin fila aspal nebe sira tau  no mos la tuir BOQ.

Bainhira jornalista halo konfirmasaun ba Antonio Agostu Guterres nudar President EKD distritu Baucau hateten katak rehabilitasaun estrada retinas Buibau EKD sei tahan osan total tamba emplementasaun progrma PDD iha baze laiha kualidade.

“Hau dehan deit ba ita boot sira katak kontruksaun estrada rutinas Buibau-Samalari EKD sei la fo sira nia osan total tamba laiha kualaidade no la tuir BOQ nebe iha. Ami nia tim tekniku Taks Force sira halo  survey estrada  neba tuir kualidade. “Se sira mak hadia fila fali ami sei fo sira nia osan. Se sira lakohi hadia ami sei la fo sira nia osan 100% husi PDD nian,” dehan president EKD.

President EKD mos informa katak “Laos ida ne’e deit maibe hanesan mos protesaun mota manulede Mos ami  ami sei la fo sira nia osan 100% ba sira tamba uluk ami dehan ona katak se sira mak la tuir nafatin  BOQ mak EKD sei la fo sira nia osan .R3