Oe-cusse - Udan boot nebe tun la para iha tinan ne’e fo impaktu la diak ba povu nia vida moris iha area rural. Iha dia 24 Janeiru kalan tuku 01:14 raimonu akontese iha Suku Abani konsege estraga to’os rai maran 8 no iha suku Malelat rai monu halakon tiha uma rua ho sasan uma laran.
Udan boot ne’e halo mota sae maka’as no iha foho tutun rai monu halo komunidade iha Oecusse balu traumatiku.
Xefe suku Abani, Gabriel Neka ba media sira iha Oecusse foin dadauk nee katak, impaktu husi udan boot estraga to’os iha Aldeia Haemnanu bairo Nono Sabuin no uma rua iha suku Malelat uma 2 rai monu taka tomak halo komunidade suco neba trauma.
Liu husi dezastre natureza ida nee, xefe suco Abani-Malelat sub-distritu Pasabe hatama dadus kona ba area to’os nebe hetan estragus inklui uma rua nee ba xefe suku atu propoin ba ministerio solidariedade sosial hodi hetan ajudu umanitaria.
Nia hatete problema dezastre natureza laos ema maka halo planeamentu hodi estraga ambiente maibe buat nee natureza ninia lalaok entaun presiza tulun husi governu ba problema ida nee.
Nia haktuir tan katak, dadus hirak nee seidauk bele lori mai edificio ministerio solidariedade social Oecusse tamba semana ida ho balu ona udan boot ba bebeik halo sira atu hatama proposta mos labele tamba ponte atu liga sub-distritu Pasabe ho capital Oecusse maka seidauk iha.
Maski nunee Neka nafatin fiar ba governu bainhira rona informasaun hirak nee no bele aloka ajudu umanitario ba ninia povu iha sub-distritu Passabe no sei bele husu mos staf ida ka rua atu bele tun diretamente hodi identifika problema nee atu foti asaun ba povu ninia nesesidade moris.
Tuir Jacob Colo, komunidade Bairo Sikone katak, kondisaun rai monu iha bairo Neno halo profesores Eskola Pre-Primaria Lalehan Cutete loron-loron tenki halo siguransa ba alunus sira nebe liu husi estrada nee ba eskola no fila ba uma.
Simao Falo nudar responsavel ONG Internasional BELUN Oecusse hafoin fila husi Suku Malelat ba media katak, problema udan boot foin dadauk nee mos konsege rai monu iha suco Malelat no taka tomak uma 2 ho sasan uma laran halo familia 2 nee la aproveita ba sira nia moris.
Alende nee, iha sub-distritu Pantemacassar, Aldeia Cutete bairo Neno Faelubu mos rai monu konsege estraga estrada kuaze kilometru ida hahu husi bairo Fatubijae ba to’o Faelubu.(KO-2)
Sem comentários:
Enviar um comentário