DILI – Politika governu implementa merkadu livre bele hamate produsaun alimentar iha rai laran no hamate agrikultura rai na’in. Tanba ne’e governu presiza tau definisaun nebe diak atu labele afeita povu agrikultor sira nia moris.
Tanba politika governu ne’e bele hamate produsaun iha rai laran sosidade sivil nebe tau matan ba vida agrikultura sira hato’o deklarasaun kontra governu iha loron mundial ba agrikultor sira iha Abril liuba.
Koordenador Hasatil Arsenio Pereira da Silva hateten, iha loron ne’e sira hakarak fo hanoin ba ema hotu katak agrikultor timoroan sei la fo ulun tamba sistema ne’e fo benefisiu deit ba ema lubun ki’ik.
“Politika hotu-hotu di’ak maibe oinsa ita tau definisaun ne’ebe di’ak para labele afeita fali ba ema seluk
nia vida no foo benefisio deit ba ema lubuk ida, “ dehan nia iha loron agrikultor mundial ne’e nebe selebra iha Jardim Francisco Borja Motael.
Prezidente Uniao Agrikultor Ermera Amaro dos Santos da Silva hateten, agrikultor tenki hatene saida maka halo ba nia – an, nune’e bele atinji agrikultor sustentavel.
Ministru Agrikultura Mariano Asanami Sabino iha intervensaun hateten, buat ne’ebe sai hanesan sasan publiku atu uza ba produsaun agrikula nian, Parlamentu Nasional tenki halo lei ne’ebe refleta ba komponente
sira hanesan autor ba dezenvolvimentu agrikultura.
“Ita tenki hare ba asuntu nasionais ne’ebe ohin ita hasoru nune’e ita bele atinji agrikultura sustentavel no ohin hau halo ona deklarasaun konjuntu ho agrikultor sira ne’ebe mai husi distritu atu hato ba Parlamentu Nasional, “ dehan Assanami.
Dodok iha Armajen
Iha parte seluk tuir reprezentante povu iha Parlamentu Nasional produtu lokal nebe governu sosa liu husi politika “povu kuda, governu sosa” dodok iha armajen tanba governu laiha planu nebe kordenadu.
Hanesan deklarasaun deputadu Estanislau da Silva katak programa povu kuda governu sosa to’o iha ne’ebe la iha planeamentu. Ministeriu Turismu Komersiu no Industria (MTCI) ho Ministeriu Agrikultura la kordenadu atu hare los produtu hira mak ita nia populasaun produs.
“Buat ne’ebe ita hola ne’e ba halo saida? La’os hola tau iha armajen estraga deit hanesan agora ne’e. Tinan kotuk liuba ami kuandu ba vizita hare lis dois, formungu fuhuk,” dehan Estanislau.
Governu nia funsaun, tuir Estanislau, la’os atu ba sosa sasan, maibe tenki tuir koperativa ka tuir komersiante.
Hanoin hanesan hato’o mos husi deputadu Bankada CNRT Arão Nóe. Tuir nia, programa ne’e diak, maibe iha implementasaun ne’e mak problema, tanba buat ida sosa ne’e la’os sosa deit maibe tenki halo mos ninia kualidade.
“Laos atu ita hola deit rai seman rua dodok ona,” dehan
nia.(TP)
Sem comentários:
Enviar um comentário