LIA-BALA - Estudante Ensino Basico Terseiro Ciclo Publico Filial iha area Uai-Laco Aldeia Lia-Bala Suco Uato-Haco, Subdistrito Venilale durante tinan 6 ona kontinua halao prosesu aprendisazem iha uma uma du’ut nebe hari’i husi komunidade rasik.
“Eskola ida ne’e harii laos husi parte edukasaun maibe ne’e inisiativa husi inan aman estudante husi aldeia Lia-Bala suco Uato-Haco, Uaicana, Waibobo Saelari Suco Bado-Ho’o, aldeia Kumo-Oli, Daralata Suco Badomori no Suco Waibobo Subdistrito Ossu Distrito Viqueque tanba estudante atu ba eskola iha Venilale tenki lao ain kilometru 10 liu hafoin hetan eskola,” dehan Cordenador Eskola Egas da C. Amaral ba jornalista BT semana liuba.
Nia informa katak komunidade sira mak iha inisiativa harii eskola provizoria nebe halo husi du’ut no didin, oda matan ho mos janeila halo husi au atu nune’e sira nia oan sira atu lao besik liu tan.
Nia hateten katak eskola refere filial ba eskola nukleu Venilale nebe hari’i iha tinan 2006 liu ba ho estudante periode primeiro iha ona SMA no sira nebe oras ne’e dadauk iha hamutuk 56 alunos primeiro ano 20, Segundo ano 16 no terseiro ano 20 pesoas ho professor voluntary nain 3, kontratadu nain 2 no permanente nain 1.
Durante tinan 6 nia laran eskola ida ne’e hetan ajudu husi parte governu. Ministerio Edukasaun 50% hanesan meza, kadeira, kuadro, livru, osan subsidiu eskola nian, fo fungsionario nain 3, rua kontratado no ida permanente. Husi parte komunidade 50% mak hari’i uma tradisional sala tolu ho eskritorio professor/a ida.
Koordenador eskola ne’e hato’o katak difikuldade engeral nebe sira hasoru ne’e barak liu maibe difikuldade primeiro nebe parte eskola iha no atu husu mak konaba kondisaun fiziko eskola ho edificio professor/a sira nian. Difikuldade seluk mak konaba kampo tebe bola, voli nebe seidauk hadia, sintina, bee moos inklui merenda eskolar tanba estudante balun mai husi Daralata, Komu-Oli, Waibobo no Uaikana nebe lao ain kilometru 4 to’o 5.
Liu husi oportunidade ne’e koordenador eskola filial ne’e husu ba ministerio atu hari’i uma eskola, edificio professor, estrada ba escola, saniamento bee moos, sintina, biblioteka no fo kontrato ba funsionario nain tolu nebe sei kontratado hela husi 2006 to’o agora.
Egas mos informa katak ho kondisaun eskola ne’e parte komunidade hamutuk ho professor sira halo ona proposta ba hatama diretamente iha ministerio edukasaun maibe to’o agora seidauk iha resposta ruma.
Iha tempo hanesan Ana S. Belo no Joanico G. de Sousa husu ba governo liu-liu ministerio da edukasaun atu tau atensaun ba konstrusaun uma eskola ho escritorio professor/a atu nune’e bele troka uma tradisional nebe sira nia inan aman hari’I ho tradisionalmente.“Ami hakarak husu ba ministerio edukasaun atu tau atensaun lalais ba kondisaun uma eskola nebe halo husi ami nia inan aman sira tanba tinan 6 ona airin uma nian ho du’ut komesa a’at dadauk ona” husu estudante Ana ho Joanico.
Husi sorin seluk superintendente edukasaun distrito Baucau Januario Cabral hateten katak konaba uma eskola filial Wailako nebe sei iha semi permanente ne’e ninia dadaus iha hotu ona data base infrastruktura ministerio edukasaun nian soke prosesu dezenvolvimento seidauk bele lao tanba tenki hare mos posiblidade no kbi’it ministerio nian, inklui professor voluntario nian mos iha hotu ona data base.
Sem comentários:
Enviar um comentário