Edisaun segundo

Ami Nia Lian

Ami Agradese

Ba leitor jornal semanal Business Timor mak ami respeita! Ami agradese tebes tanba bele hasoru malu fali ho Ita-Boot sira iha edisaun segundu ne’e. Iha edisaun dahuluk nian, iha resposta no komentariu nebe pozitivu no mos negativu. Ba komentariu sira ne’e ami simu ho laran luak, konsidera ida ne’e bele fo motivasaun
ba ami atu hakat ba oin tan hodi fo informasaun nebe diak liu tan.
Hanesan ami fosai iha edisaun primeiru katak lee-nain sira seidauk bele hetan informasaun barak tuir Ita-Boot sira nian nesesidade. Iha inisiu ne’e, ho rekursu nebe limitadu hela, saida mak ami look ba Ita-Boot sira foin mak informasaun seremonial iha Dili nebe ami konsege rekolla. Ami sukat ami nia kbiit nudar jornal foun nebe harii husi ekipa ki’ik ida, konserteza sei la’o neneik maibe pasti.
Ami kompriende ba resposta balu nebe pesimista ho ami nia prezensa. Duvida hirak ne’e bazeia ba esperiensia nebe ita iha katak durante Timor Lorosa’e ukun rasik an, tinan 10 ona sura ho governasaun Untaet nian, iha media imprime barak mak mosu depois nia vida la naruk alias moris
la kleur mate fali ona. Foin fulan ida rua mosu lakon fali. Nebe ida pesimista ne’e normal. Importante ba ami mak Ita-Boot sira nia nesesidade atu hetan informasaun kona-ba area ekonomia nian. Se Ita-Boot sira sente informasaun kona-ba dezenvolvimentu ekonomia ne’e importante ka sai nesesidade ba iha Ita nia moris, no dezafia ami atu publika ho kualidade, ida ne’e mak esforsu ami nian atu halo.
Prezensa jornal ida ne’e diferente duni ho jornal sira nebe eziste kleur ona tantu diariu, semanal, no mensal. Temi diferente tanba Business Timor nudar jornal nebe foka deit ba area dezenvolvimentu ekonomia, la tama area politika. Karik iha mos ba politika ekonomika nian deit. Business Timor mos tampil beda tanba mosu ho full color. Pajina hotu-hotu ho kor. Ne’e duni bele halo sira nebe hakarak halo publisidade ka iklan iha jornal semanal ne’e mos tampil beda, bele dada ema nia animu atu hatene diak liu tan produtu nebe hatudu iha jornal ne’e. Ida ne’e mak sai asuntu nebe importante nebe ami tetu tasak didiak ona hodi buka imprime nebe iha kualidade hanesan hatudu iha jornal nebe Ita-Boot sira kaer no lee daudaun ne’e.
Kona-ba notisia sira nebe ami aprezenta, iha edisaun ida dahuluk (primeiru) nian, atividade seremonial no komunikadu
imprensa nebe ami rekolla iha kapital Dili. Iha edisaun daruak (segundu) ne’e ami aprezenta buat balu nebe diferente uitoan kompara ho edisaun uluk.
Iha edisaun semana ida ne’e, Ita sei hetan informasaun
uitoan lian husi baze liuliu agrikultor balu no mos industria
ki’ik rai laran hanesan produtu au nebe halo husi Centru Bambu Timor Leste (CBTL) iha Tibar. Ita barak mak dalaruma seidauk hatene katak timoroan sira mos produs ona sasan nebe iha kualidade diak tebes, nebe ita presiza orgullu no fo apresiasaun ba produtu rai laran. Ita nia rai doben Timor Lorosa’e riku ho au nebe potensia tebes atu dezenvolve industria mobliariu iha rai laran duke ita hola fali sasan husi liur nebe nia kualidade hanesan maibe folin boot liu fali sasaun produsaun rai laran. Espera katak ho informasaun hirak ne’e Ita-Boot sir abele halo desizasaun nebe loos ba imi nia nesesidade moris loro-loron nian.
Ba Ita-Boot sira nebe matenek iha area dezenvolvimentu
ekonomia nian karik balu hakarak fahe uitoan ninia matenek ba sira seluk nudar kontribuisaun ida ba kapasitasaun
timoroan sira, fatin ba Ita-Boot sira mak jornal ida ne’e. Bele hakerek iha koluna opiniaun, no mos liu husi intrevista hanesan baibain.
Sente dezafia ba ami bainhira resposta imi nian kontrariu
ho opiniaun sira nebe hatete katak timoroan sira ladun interese ba notisia kona-ba ekonomia, karak liu lee notisia politika. Ami agradese no hato’o apresiasaun ba Ita-Boot sira nebe fo reasaun pozitivu bainhira ami mosu edisaun primeiru semana liuba. ***