Hetan Ajudu Trator husi MAP Hakarak Halo Natar Dala Rua Tinan Ida

LAGA- Programa IV Governu Konstitusional liu husi Ministeriu Agrikultura no Peska (MAP) fahe trator-liman ba grupu agrikultor sira iha teritoriu Timor Lorosa’e laran tomak atu hasae produsaun, oras neé dadaun iha baze komesa hatudu ona rezultadu balun nebe pozitivu.
Agrikultor sira iha baze komesa ona organiza an hodi implementa programa
Ministerio Agrikultura nian nebe bolu sistema ICM, ka kuda hare ho lina nebe servisu hamutuk ajensia internasional GTZ.
Hanesan rezultadu nebe grupu agrikultor MAIT (Moris Agrikultura Integrado) Tekinomata hala’o hafoin simu
ajudu trator.
Responsabel MAIT Manuel Damiao Lemos hateten katak ho ajudu trator liman husi MAP, agrikultor sira hetan produsaun nebe sufisiente durante tinan rua nia laran kompara ho tempu liuba nebe uza karau ka
kuda hodi halai natar.
“Grupu MAIT harií iha tinan 2007 ho objetivu atu bele koresponde programa ministerio agrikultura nian.
Iha momentu neba ami harií tiha grupu mesmo seidauk iha trator, maibe konsege implementa kedas sistema
ICM ka kuda hare ho lina durante tinan rua nia laran,”dehan Manuel.
Manuel hatutan tan katak tama iha tinan 2009 grupu neé hetan duni ajuda trator liman ida ho marka Quick husi MAP hodi halai haluan liu tan fila rai nebe dala barak abandona. Responsabel informa mos katak depoisde hetan tiha traktor liman refere, grupu MAIT konsege halo ekstensifikasaun halai natar hektare 25 iha area suku Tekinomata. Rezultadu tinan tolu tutuir malu aumenta halo sira laran haksolok ba ida ne’e.
Difikuldade nebe grupu neé sempre infrenta iha tinatinan mak konaba fini hare nebe sempre toó tarde, la iha treinamentu ruma husi ekstensionista sira ba grupu agrikultor, la iha monitorizasaun ekstensionista nian, irigasaun nebe sempre aát kuando tempo udan boot.
Manuel mos husu atu harii barajen ka dam iha area Lia-Nau suku Tekinomata, tanba natar produtivu hamutuk hektare 15 nebe abandona desde tempu okupasaun Indonesia toó agora.
Grupu agrikultor sira iha Suku Tekinomata hakarak halai natar dala rua maibe irigasaun mak la dun sufisiente no falta treinamentu husi extensionista sira ba grupu agrikultor sira konaba oinsa halai natar dala rua tinan ida.
Manuel mos husu ba ministerio agrikultura atu implementa lalais harií varazem (Dam-red) iha fati-fatinhodi nuneé agrikultor sira bele halai natar dala rua iha tinan ida.
Iha tempo hanesan Jorge Correia Gaio nudar agrikultor ida nebe la tama iha grupo hateten katak sistema nebe mak MAP uza diak teb-tebes atu bele azuda agrikultor sira hodi hasae produsaun.
Maibe nia parte senti triste seidauk hetan azuda traktor ruma hodi bele halai natar hanesan maluk agrikultor sira seluk, mesmu nuneé ninia parte fiar an no selu ema seluk nia traktor hodi bele halai ninia natar.
Tanba neé nia parte husu ba departamento agrikultura distrito no ministerio atu bele tau atensaun ba agrikultor sira nebe seidauk hetan bele mos hetan, bainhira programa azuda traktorneé iha fali. (bmg)