GLENO----Raan arte nian suli ba Jose Maria Martins (otas tinan 27) nebe soi talentu hodi nia iha kreatividade. Mane husi suku Mertutu, Ermera ne’e ho nia talentu arte nian hamosu obra (karya) estatua nebe halo husi Fatuk mean. Ba jornal Business Timor, semana liu ba iha nia hela fatin “Aldeia Sakbesi Lima” Suco Mertutu Sub distrito Ermera, Jose haktuir katak talentu nebe nia iha mai husi nia fuan rasik, no nia nunka hetan treinamentu ruma ka eskola kona ba arte. Obra ida ne’e mosu husi nia hanoin rasik. Tanba ne’e nia galeria hanaran “ARTE CORAÇÃO” katak talentu ne’e mai husi fuan rasik.
Jose informa katak hahu husi 15 Outobru 2010, nia iha hanoin hodi kria estatua. Nia konsege halo ka produz ona estatua nudar replika lideransa balun ona hodi entrega diretamenta ba iha lideransa hirak ne’e. Estatua nebe nia halo ona mak mak hanesan atual Presidente Republika RDTL Dr. Jose Ramos Horta, atual Presidente Parlamentu Nasional Fernando Lasama de Araujo, Primeiru Ministru Kay Rala Xanana Gusmao, Atual Ministru Saude Dr. Nelson Martins, Matebian Major Alfredo Reinado, matebian Deputado Parlamento Nasional Grabiel Ximenes Alias FITUN, Xefe Antigo Combatente Calistro Bere – Mau, Eis falintil / Veteranus Leandro, Eis Falintil/ Veteranus Luis Maria da Silva “Alias Mane Maluk” Amo Papa Bento XVI, atual Presidente Amerika Barack Obama, no mos estatua seluk tan nebe halo hamutuk iha fatin ne’e inklui estatua Igreja nian.
Jose haktuir katak estatua sira nebe nia produz ona tuir dadus nebe nia mensiona oras ne’e dadaun entrega ona ba ema sira ne’e ida – idak, hela deit Papa Bento XVI, Presidente BARACK OBAMA, no estatua Igreja nian maka sei rai iha nia fatin hanesan ezemplu ida ba ema wainhira ema ruma halo vizita. Tuir nia, estatua hirak nebe entrega ona ne’e ho gratuitamente, no laiha kontratu ka ho presu ruma, tamba ho intensaun atu halo promosaun ba lideransa sira kona ba ninia obra.
Jose informa katak nia iha inisiativa ida ne’e hodi kria ona estrutura ba Grupu Arte Coração ne’e liu husi joven lubuk ida konta hamutuk nain sanulu (10) nebe halibur an hamutuk iha grupu ne’e. Atu promove grupu ne’e iha futuru mai, Jose husu liu ba governu atu bele tulun sira liu husi fundus ruma atu bele suporta sira nia atividade ne’e. Obra husi Jose ne’e bele dehan uniku iha rai laran.
Kompania barakbarak espalla iha ita nia rai laran, iha Distritu Ermera maibe halai ba atividade seluk deit, seidauk hamosu obra husi fatuk mean ne’e. Atu halo estatua husi fatuk mean ne’e Arte Coração iha ekipamentu sira hanesan katana tradisional, tudik tradisional, bahat, lisador, pinsel, esquadro, metru, tinta, no seluk-seluk tan.
Fatin atu halao atividades seidauk iha, no sira sei uza hela deit fatin nebe sira hela ba, kuaze 20 km husi Gleno. Sira mos halo esforsu oioin hodi buka fundus no hatama ona proposta iha instituisaun balun maibe to agora seidauk iha rezultadu. Ho publikasaun sira nia atividade ne’e liu husi media jornal Business Timor, karik ema balun hakarak fo tulun sira. (KE-1)
Sem comentários:
Enviar um comentário