DILI – Seminar loron rua konaba jestaun fundu petroleum nebe organiza husi Ministériu Finansas iha Dili Convention Center (Eis Mercado Lama) iha 10 – 11 Maiu, hamosu perguntas husi ema barak relasiona ho oinsa atu jere fundu ne’e.
Orador sira iha seminar ne’e reprezenta parte kompetente sira nebe toma konta ba jestaun fundu minarai TL nian. Sira mai husi Noruega, Nova Zelandia, Australia no Timor-Leste rasik.
Wainhira koalia iha seminar ne’e, Alex Joia, Spesialista Senior ba Jestaun Asset nian iha Banku Pagamentu Internasional (BIS) konfirma importansia husi knaar jestor eksternal atu jere fundu refere, molok hatama ba iha Banku Federal Amerika.
Alex mos hateten katak, agora dadauk TL sei uza servisu BIS ho razaun tanba kapasidade rekursu umanu nebe sei mínimu, sistema no fatin ka proximidade (kedekatan)ba merkadu internasional.
Razaun seluk mos tanba BIS hala’o knaar nebe importante tebes atu hametin koperasaun entre banku sentral sira no ajensia sira seluk atu bele atinji estabilidade monetariu no finansas. BIS mos serve nudar banku ba banku sentral sira seluk.
Responde ba pergunta tanba sa mak TL hili BIS, Alex hatán, “Konfiansa ne’e importante.”Peter Ryan-Kane, Xefe Konsilleiru Portofoliu iha Tower Watson, hafoin seminariu ne’e fo komentariu konaba estratejia investimentu katak, maneira nebe uza atu jere fundu ne’e apropriadu ba perfil risku nian no etapa sira dahuluk husi fundu ne’e.
Tuir Peter, estrutura nebe tau hamutuk ona atu haketak koleksaun rendimentu minarai husi taxa, royalti no mos depózitu nebe dirije ba merkadu iha Nova Yorke. Hafoin ida ne’e, jestaun fundu ne’e tenki haketak husi prosesu orsamentu no transferensia rendimentu ba orsamentu nia laran. Liu husi ESI ka kalkulasaun rendimentu sustentavel ne’e hanesan maneira nebe diak atu hala’o ida ne’e.
“Ne’e hahu atu iha risku barak hodi bele hetan retornu nebe barak,” Peter hateten.
Nia hatutan tan katak, atu bele hetan retornu nebe boot, sufisiente mos atu fo fundu liu husi ESI ka kalkulasaun rendimentu sustentavel.
Tower Watson mos sujere katak, alende investe fundu ne’e ba Merkadu Treasury Amerika nian, pelo menus 25 % husi fundu ne’e bele investe mos ba equity global.
“Razaun prinsipal atu halo ida ne’e mak atu hetan perfil retornu nebe boot hodi bele fo fundu atu hasai osan regular nebe sustentavel husi banku,” Peter hatutan. Entretantu, komenta konaba estratejia investimentu,
Peter Ryan-Kane hateten katak iha alternativa rua ba TL, ita bele hili estratejia nebe konservativu liu no moris nafatin montante osan nebe ki’ik husi fundu ne’e kada tinan, ka TL bele iha target ba osan nebe boot liu maibe presiza atu hetan mos risku retornu nebe boot atu halo ida ne’e.
Tuir stipulasaun lei fundu petroliferu katak, kada tinan ita tenki hasai 3% husi fundu ne’e, se ida ne’e mak akontese hela, entaun fundu ne’e tenki foti risku barak hodi bele hetan nivel retornu nebe apropriadu. Entaun, atu fo fundu ba ida ne’e, fundu ne’e rasik presiza atu hetan retornu nebe boot.
Osan 3 % ne’e efetivamente foti husi retornu nebe mai husi produsaun iha pasadu nebe tama ona iha fundu no mos produsaun iha futuru.
“Entaun, agora dadaun ita boot (TL) sira hatama ona osan ne’e ba iha orsamentu estadu, no hau senti ida ne’e apropriadu ba ekonomia nebe sei iha nesesidade infrastrutura no dezenvolvimentu,”
Peter hateten.
Wainhira taka seminar ida ne’e, Jose Luis Guterres, afirma katak ne’e hanesan etapa importante ida ba foin sa’e Timor sira atu komprende funsaun fundu minarai Timor nian, no bele jere fundu ne’e iha futuru wainhira
jerasaun tuan laiha ona.
(The War)
Sem comentários:
Enviar um comentário