edisaun primeiru

Ami Nia LianTempu Ba Halo Mudansa

Bainhira hato’o ideia ka hanoin atu harii jornal ida nebe foka liu ka espesial ba dezenvolvimentu ekonomia, kolega jornalista balu hatete
katak jornal ne’e sei labele ba oin. Ema sei la interese ba jornal ne’e. Sira fo razaun katak povu Timor Lorosa’e nebe hatene lee, seidauk iha interese masimu ba notisia kona-ba ekonomia. Ema karak liu lee notisia politika duke kona-ba notisia ekonomia.
Razaun ne’e la’os bazeia ba peskiza nebe klean kona-ba minat lee iha sosiedade timoroan nia leet maibe bazeia deit esperiensia basar fa’an jornal sira durante ne’e. Katak ema sosa jornal diak bainhira iha notisia politika. Bainhira jornal laiha notisia politika nian, ema ladun iha minat ka interese atu lee. Tanba ne’e it abele haree no nota media imprime sira tantu diariu (harian) no semanal (mingguan) hotu-hotu “rame-rame” ho informasaun kona-ba politika barak liu duke informasaun seluk.
Ohin loron ami mosu ho ideia foun. Ideia hamoris jornal matadalan ba dezenvolvimentu ekonomia, la’os la fo konsiderasaun ba hanoin hirak mensiona iha leten, maibe ho hanoin ida katak opiniaun hirak ne’e bele loos hotu bele mos balu ladun loos karik.
Ami fiar katak povu Timor Lorosa’e tomak husi ema kiak sira to’o ema intelektual sira no na’i-ulun sira barak mak interese hela informasaun kona-ba oinsa ita nudar nasaun bele moris diak, oinsa povu ki’ik sira sustenta sira nia moris hanesan moris fila-liman ka negosiu, dezenvolve ekonomia familia uma laran.
Ami fiar katak moris iha ambiente demokrasia bele la’o diak bainhira ema hotu sente nia moris natoon atu bele moris iha sosiedade nia laran.
Ami mos sente katak informasaun nebe durante ne’e media sira publika
seidauk maximu tanba razaun rekursu ema no mos fasilidade nebe limitadu. Kona-ba rekursu ema nian iha media sira, liuliu iha media imprime
hanesan jornal sai ona obstaklu iha dezenvolvimentu media komunikasaun
iha rai laran durante nasaun ne’e ukun an. Ami nia kapasidade nudar jornalista, to’o ohin loron iha deit kbiit atu fosai liafuan loloos husi fonte sira liu husi kultura gravasaun. Ami nia kapasidade seidauk to’o atu analiza liafuan sira nebe fonte sira fo sai. Fasil liu ba ami jornalista sira atu hakerek deklarasaun politika husi fonte sira nebe ami bele rona maski barak liu mak ami la kompriende. Ami nia kbiit atu uza ‘pancaindra’ nudar umanu seidauk maximu. Iha parte ida mos, tanba jornalista bele asesu lalais deklasaun politika duke informasaun nebe ema koalia ho dadus.
Ita toman ona ho notisia politika tanba ema politiku sira baibain fasil atu fo deklarasaun politika duke koalia kona-ba dadus.
Tanba ne’e tuir ami nia hanoin, oras ne’e tempu ona atu ita halo mudansa.
Mudansa nebe ami mensiona katak ita labele diverte ita nia moris ho deit sensasi politik loroloron, maibe mos koko atu hanoin oinsa bele diverte an mos ho informasaun nebe bele loke ita nia neon atu bele moris
sustenta vida familia iha uma laran, iha komunidade, no mos nasaun. Nune’e ami espera ho prezensa jornal mata-dalan ba dezenvolvimentu ekonomia ne’e bele sai nudar alternativa ida, atu publiku alende hatene dalan politika, bele mos hatene oinsa lalaok vida ekonomia iha nasaun laran.
Iha parte ida ami sente mos ema sira nebe halao knar iha parte teknika jestaun nian hanesan ezekutivu sira susar atu fo deklarasaun ba jornalista sira. Dalabalu sira nebe la’os ema politiku, lakohi fo informasaun
tanba duvida jornalista nia kapasidade atu kompriende saida mak nia koalia. Tauk nia reputasi bele monu tanba jornalista hakerek no fosai buat nebe karik nia kolia oin ida fosai fali oin seluk. Bele mos nia tauk tanba jornalista sira bele ke’e sai ninia hahalok aat nebe nia subar metin para publiku labele hatene.
Ami mos sente kritika barak durante ne’e fo ba jornalista no media sira tanba informasaun nebe sentralizadu, barak liu husi Dili laran ka ema sira iha kapital laran. Media seidauk bele lolo liman to’o iha area rural hotu tanba razaun rekursu.
Nune’e mos prezensa jornal semanal Business Timor nudar matadalan ba informasaun dezenvolvimentu ekonomia ne’e, hasoru problema hanesan.
Dezafiu boot mak oinsa bele hetan ema sira nebe iha kapasidade atu bele halibur informasaun husi baze liuliu povu ki’ik sira nebe sei moris kiak. Iha edisaun primeiru ne’e lee-nain sira seidauk bele hetan informasaun barak husi baze. Ida ne’e foin mak informasaun seremonial iha Dili nebe ami konsege rekolla. Maibe ba oin Ita-Boot sira sei hetan informasaun nebe naton.
Ami nia misaun hanesan mensiona iha moto nudar Matadalan ba Dezenvolvimentu Ekonomia, informasaun hirak nebe fo sai iha ne’e sei la ses husi ne’e. Inklui iha ne’e mak kona-ba atividade komersiu, negosiu, industria, turismu, teknolojia, atividade agrikultor sira, peskador sira, finansa, banku sira no seluk tan nebe iha relasaun ho dezenvolvimentu ekonomia. Ami espera bele hetan resposta nebe pozitivu husi publiku ba ami nia prezensa.