CBTL Loke Kampu Servisu Ba Juventude

TIBAR- Ministru Ekonomia no Dezenvolvimentu Joaõ Mendes Gonsalves hatete governu sempre buka meus atu loke kampu servisu ba juventude sira liu husi kria projetu oioin. Hanesan Centru Bambu Timor Leste (CBTL) Tibar nebe akumula juventude sira servisu iha sentru au ne’e.
Iha seremonia entrega ekipamentu husi United Nations Industrial Development (UNIDO) ba CBTL, Kinta semana liuba, Joao Gonsalves hatete, ba oin governu sei halo servisu ho parseiru sira atu nune’e bele loke tan produsaun sira ne’e iha distritu sira hodi bele dezenvolve kapasidade joventude sira.
Tanba ne’e nia fo agradese ba reprezentante UNIDO Faroq nudar parseiru nebe durante ne’e fo ajudu maka’as hodi hari hikas fali projetu produsaun bambu refere hodi sai hanesan fatin servisu ba juventude sira.
Husi parseiru UNIDO sei ajuda tan osan rihun $270 (dolar rihun atus rua hitunulu) iha tinan oin mai hodi suporta tan ba sentru refere. Ne’e bele hadia liu tan kapasidade traballador sira nian, no iha orsamentu estadu mos sei kontinua nafatin atu aprova tan hodi suporta ba produsaun refere.
Tanba ne’e nia fiar katak projetu ai bambu ba oin sei lao diak liu tan hodi loke kampu servisu ba joventude hotu iha rai ida ne’e.
“Ita nia governu iha inisiativa atu hari produsaun sentru bambu ne’e hahu kedas iha tempo governo uluk maibe ikus liu sai abandonadu no laiha dalan atu bele intrega fila fali,” dehan Ministru Joaõ Gonsalves iha nia diskursu.
Nia dehan iha 2007 Wainhira nia simu knar nudar MED koalia kedas ho Primeiru Ministru nebe fo responsabilidade ba nia atu avansa ba oin hodi reativa fali programa nebe governu uluk halao ona.
“Hau bele dehan difikuldade boot tanba governo fo sala tiha depois de asina akordu no la kumpri,”dehan ministru ne’e.
Nia dehan atu hahu fila fali produsaun refere susar tebetebes maibe iha parseiru sira nebe fo ajuda maka’as hodi hari hikas fali to’o ohin loron. Prezensa iha seremonia ne’e Ministra Solidariedade Sosial Maria Domingas Fernandes, Vise Ministru Ekonomia Dezenvolvimentu Dr. Cristiano da Costa, Sekretariu Estadu Meiu Ambiente Abilio Lima, no Sekretariu Estadu Asistensia Sosial Jacinto Rigoberto.
“Liu husi oportunidade ida ne’e hau hakarak fo agradesementu ba ema hotu liu liu ba ministra solidaredade
sosial nebe utiliza fatin refere maibe to’o ikus entrega dunia ba projetu produsaun.
No mos fo agradese ba ema sira nebe durante ne’e servisu makaas hodi kontobui ba projetu refrere.”
Nia fiar katak ho sentru treinamentu bambu laos deit atu produs bambu maibe sei fo mos formasaun barak ba juventude sira. Nune’e fo mos ba futuru emprezariu sira nebe atu loke empreza ruma hodi prepara ba sentru refere.
Tuir nia katak projetu refere laos deit atu halo treinamentu ba produsaun bambo maibe sei iha treinamentu
ba traballador no treinamentu ba emprezariu sira.
Nia dehan Governo AMP laos deit atu hadia kualidade ekonomia maibe mos sei dezenvolve produsaun oin-oin iha Timor Leste tanba nasaun ne’e atu lao diak tenke hare mos ba produsaun iha rai laran.
Nia informa tan katak governu sei servisu makas ho parseru sira atu loke tan produsaun ruma atu nune bele fo valor nebe boot nasun ida ne’e,” informa nia.
(ico)